ᐃᓄᐃᑦ ᓄᓇᓖᑦ ᖃᐅᔨᒪᒻᒪᑕ ᐋᖅᑭᓯᒪᔾᔪᑕᐅᑦᑎᐊᕈᓐᓇᓂᕐᐹᓂᑦ ᐊᑲᐅᙱᓕᐅᕈᑕᐅᕙᑦᑐᓂᑦ ᐊᑐᕐᐸᑦᑕᖏᓐᓂᒃ, ᐊᒻᒪᓗ ᐊᓐᓇᐅᒪ ᑲᓲᑎᑎᑦᑎᕙᑦᑐᓂ ᐃᑉᐱᒍᓱᑦᑎᐊᐸᑦᑐᓂᑦ ᓄᓇᖅᑲᑎᖏᓐᓂᒃ ᐃᑲᔪᖅᑎᓂᑦ, ᐊᐅᓚᑦᑎᕕᓐᓂᑦ ᑲᑐᔾᔨᖃᑕᐅᕙᑦᑐᓂᑦ, ᑮᓇᐅᔭᖃᖅᑎᑦᑎᕙᑦᑐᓂᑦ, ᐊᒻᒪᓗ ᒐᕙᒪᒃᑯᓐᓂᑦ ᐱᓇᓱᐊᕋᔅᓴᖃᖅᑐᑎᒃ ᐱᕈᕐᐸᓪᓕᐊᑎᑦᑎᓂᕐᒥᒃ ᓄᓇᕗᒥ ᓄᓇᓕᓐᓃᑦᑐᓂᑦ ᐊᒻᒪᓗ ᐃᓄᓐᓄᑦ−ᑐᑭᒧᐊᑦᑎᑕᐅᔪᓂᑦ ᖃᓄᖅᑑᕈᑕᐅᔪᓂᑦ.

ᐊᓐᓇᐅᒪ ᓇᐃᓈᕐᓯᒪᓪᓗᒍ ᐆᒪ ᑐᑭᒋᒻᒪᒍ ᐊᓐᓇᐅᒪᒃᑲᐃᔩᑦ, ᑖᓐᓇ ᐃᓄᒃᑎᑐᑦ ᐅᖃᐅᓯᖅᑎᒍᑦ ᐃᒫᒃ ᑐᑭᓕᒃ “ᐃᑲᔪᕐᓂᖅ ᑭᒃᑯᑐᐃᓐᓇᕐᓂᑦ ᒪᑭᑕᖁᓪᓗᒋᑦ.” ᐊᓐᓇᐅᒪ ᐋᖅᑭᑦᑕᐅᓯᒪᔪᖅ ᐃᑲᔪᕈᒪᓪᓗᑎᒃ ᐃᓄᓐᓄᑦ ᑲᔪᓯᑎᑦᑎᕙᓪᓕᐊᓂᕐᒥᒃ ᐱᙳᖅᑎᑦᑎᕙᓪᓕᐊᓂᕐᒥᒃ ᐃᓱᒪᒋᓯᒪᔭᖓᓂᒃ ᑲᔪᓯᑎᒍᒪᒐᔭᖅᑐᒍ ᓄᓇᕗᒻᒧᑦ.

ᐅᓪᓗᕆᐊᖅ Hᐊᓐᓴᓐ

ᐅᓪᓗᕆᐊᖅ (ᐅᓪᓗ) Hᐊᓐᓴᓐ ᐃᓅᓂᑯ ᐱᕈᕐᓯᒪᓪᓗᓂᓗ ᐃᖃᓗᓐᓂ. ᐱᒋᐊᖅᑎᑦᑎᖃᑕᐅᓯᒪᔪᖅ ᐊᓐᓇᐅᒪ ᓄᓇᓕᓐᓂᑦ ᑐᙵᕕᒻᒥᑦ, ᐅᓪᓗ ᐊᑑᑎᓕᓐᓂᑦ ᐃᑲᔫᑎᖃᕐᓂᐊᖅᑐᖅ ᑕᒪᒃᑮᓐᓂᒃ ᐃᓕᑦᑎᓯᒪᑦᑎᐊᕐᓂᖓᓄᑦ ᐊᒻᒪᓗ ᓄᓇᓕᓐᓂᑦ ᖃᐅᔨᒪᔭᖃᑦᑎᐊᕐᓂᖓᓄᑦ. ᐅᓪᓗ ᑐᑭᒧᐊᑦᑎᑦᑎᓯᒪᔪᖅ ᐱᕙᓪᓕᐊᓂᖓᓂᒃ ᖃᐅᔨᓴᖅᑏᑦ ᑲᑐᔾᔨᖃᑎᒌᑦ, ᓄᓇᕗᒥ ᓯᕗᓪᓕᕐᐹᖑᓪᓗᓂ ᐃᑲᔪᖅᑏᑦ ᑲᑐᔾᔨᖃᑎᒌᑦ ᐃᓅᓪᓗᑎᒃ ᖃᑭᒪᒍᑎᔅᓴᓕᐅᕋᓱᐊᖅᑎᐅᒐᑎᒃ. ᑲᑎᒪᔨᐅᖃᑕᖅ ᕇᑑ Hᐊᓪ ᑐᙵᕕᒻᒥ ᐊᒻᒪᓗ ᐃᔅᓯᕙᐅᑕᐅᕙᑦᑐᓂ ᐱᓕᕆᐊᕐᒧᑦ ᑲᑎᒪᔨᕋᓛᕐᓂᑦ.

ᐅᓪᓗ ᐊᖏᔪᖅᑳᑉ−ᑐᖏᓕᐊ ᓄᓇᓕᓐᓂᑦ ᑐᑭᒧᐊᒍᑎᔅᓴᓂᓪᓗ ᐱᕙᓪᓕᐊᔪᓕᕆᓂᕐᒧᑦ ᐹᕕᓐᓛᓐ ᓴᕕᕋᔭᔅᓴᓂᑦ ᐅᔭᕋᓐᓂᐊᕐᕕᒻᒥ. ᒥᓂᔅᑕᒧᑦ ᑐᖏᓕᐅᓚᐅᕐᓯᒪᔪᖅ ᐱᕙᓪᓕᐊᔪᓕᕆᔨᒃᑯᓐᓂ ᐃᖏᕐᕋᖃᑦᑕᖅᑐᓕᕆᔨᒃᑯᓂᓪᓗ (ᓄᓇᕗᑦ ᒐᕙᒪᒃᑯᖏᓐᓂ), ᐊᒻᒪᓗ ᐃᖅᑲᓇᐃᔮᖃᖃᑦᑕᕐᓯᒪᔪᖅ ᐊᐅᓚᑦᑎᔨᒻᒪᕆᐅᓂᕐᒥᒃ, ᐊᒻᒪᓗ ᐋᔩᕋᖅᑎᓪᓗᐊᑕᐅᓂᕐᒥᒃ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂ, ᓄᓇᑖᕐᓂᕐᒧᑦ ᑎᒥᐅᔪᒥ ᑭᒡᒐᖅᑐᐃᔪᓂᑦ ᓄᓇᕗᒻᒥᐅᓂᑦ ᐃᓄᓐᓂᑦ.

ᐅᓪᓗ ᐱᔭᕇᕈᑎᑖᕐᓯᒪᔪᖅ ᖁᕝᕙᓯᓐᓂᕐᓴᒥ ᐃᖅᑲᓇᐃᔭᕐᕕᓕᕆᓂᕐᒧᑦ (BBA) ᐆᑲᓈᒐᓐ ᓯᓚᑦᑐᓴᕐᕕᔾᔪᐊᕐᒥ ᐊᒻᒪᓗ ᖁᕝᕙᓯᓐᓂᕐᓴᒥ ᐃᓕᓐᓂᐊᕐᓂᓕᕆᓂᕐᒧᑦ ᕗᕌᒃ ᓯᓚᑦᑐᓴᕐᕕᔾᔪᐊᕐᒥ.

ᒍᐃᓐ Hᐃᓕ ᐊᕿᐊᕈᖅ

ᒍᐃᓐ Hᐃᓕ ᐊᕿᐊᕈᖅ ᐃᓅᓯᒪᔪᖅ ᐱᕈᕐᓯᒪᓪᓗᓂᓗ ᐃᖃᓗᓐᓂ. ᐱᒋᐊᖅᑎᑦᑎᖃᑕᐅᓯᒪᓪᓗᓂ ᐊᓐᓇᐅᒪ ᓄᓇᓕᓐᓂᑦ ᑐᙵᕕᒻᒥᑦ, ᒍᐃᓐ ᐃᑲᔫᑎᖃᖃᑦᑕᓲᖅ ᐊᑐᕐᓯᒪᔭᖏᓐᓂᒃ ᓄᓇᖓᓐᓂ, ᐊᒻᒪᓗᑦᑕᐅᖅ ᐃᖅᑲᓇᐃᔮᖓᑎᒍᑦ ᐊᑐᕐᓯᒪᔭᖏᓐᓂᒃ, ᑲᔪᓯᑎᑦᑎᕙᓪᓕᐊᖏᓐᓇᖅᑐᓂᑦ ᓲᖑᓯᑎᑦᑎᕙᓪᓕᐊᓂᕐᒥᒃ ᐱᓕᕆᔪᓐᓇᕐᓂᖓᓂᒃ ᓄᓇᕗᒥ. ᒍᐃᓐ ᒫᓐᓇ ᑲᓇᑕᒥ ᑭᒡᒐᑐᖅᑎᒋᔭᐅᔪᖅ ᐅᑭᐅᖅᑕᖅᑐᒥ ᑭᒃᑯᑐᐃᓐᓇᐃᑦ ᐃᓅᓯᖏᓐᓄᑦ ᖃᐅᔨᒪᔨᑕᕐᓄᑦ ᐅᑭᐅᖅᑕᖅᑐᒥ ᑲᑎᒪᔨᓄᑦ, ᐊᖏᔪᖅᑳᕐᒧᑦ ᑐᖏᓕᕆᔭᐅᓯᒪᔪᖅ ᑲᓇᑕᒥᐅᓄᑦ ᑲᑐᔾᔨᖃᑎᒌᓄᑦ ᐅᑭᐅᖅᑕᖅᑐᒥᐅᑦ ᐃᓅᓯᖏᓐᓄᑦ; ᐊᒻᒪᓗ ᐃᓚᒋᔭᐅᓯᒪᓪᓗᓂ ᐃᒃᐱᒍᓱᓐᓂᕐᒧᑦ ᑐᙵᕕᒻᒧᑦ.

ᐱᒋᐊᖅᑎᑦᑎᖃᑕᐅᓯᒪᓪᓗᓂ ᖃᐅᔨᒋᐊᖅᑏᑦ ᐋᓐᓂᐊᖅᑐᓕᕆᓂᕐᒧᑦ ᖃᐅᔨᓴᕐᕕᒻᒥᑦ (QHRC), ᒍᐃᓐ ᓯᕗᓕᖅᑎᐅᕗᖅ ᐊᒻᒪᓗ ᖃᐅᔨᓴᖅᑐᓕᕆᓂᕐᒧᑦ ᑐᑭᒧᐊᑦᑎᑦᑎᔨᐅᓪᓗᓂ, ᑐᑭᓯᓇᓱᑉᐸᑦᑐᓂ ᓄᓇᓖᑦ ᐱᔪᓐᓇᕐᓂᖏᓐᓂᒃ ᑲᒪᒋᔭᖃᕐᓂᕐᒧᑦ ᓄᓇᓕᓐᓂᑦ ᐋᓐᓂᐊᖅᑐᓕᕆᓂᕐᒧᑦ ᐃᓱᒫᓘᑕᐅᕙᑦᑐᓂᑦ. ᑖᒃᑯᐊ ᐱᓕᕆᐊᕆᕙᑦᑕᖏᑦ ᐊᖅᑯᑎᒋᓪᓗᒋᑦ, ᒍᐃᓐ ᖃᐅᔨᒪᔪᖅ ᐱᒻᒪᕆᐅᓂᖓᓂᒃ ᑲᒪᒋᔭᖃᖃᑦᑕᕐᓂᖅ ᐋᓐᓂᐊᖅᑐᓕᕆᓂᕐᒥᒃ ᖃᐅᔨᓴᖃᑦᑕᓂᕐᒥᒃ ᐃᑲᔪᕐᓱᐃᔪᓂᑦ, ᐊᑦᑕᓇᙱᑦᑐᒥᒃ, ᐃᓕᖅᑯᓯᕐᓂᑦ−ᐃᑉᐱᒍᓱᑦᑐᓂᑦ, ᐊᒻᒪᓗ ᑐᙵᕕᓕᓐᓂᑦ ᐱᔾᔪᑎᖃᕐᐸᑦᑐᓂᑦ. ᑕᐃᒫᒃ ᖃᐅᔨᒪᔭᖃᖅᑐᓂ ᑐᑭᒧᐊᒍᑎᖃᕐᐸᑦᑐᖅ ᐃᖅᑲᓇᐃᔮᖏᓐᓂᒃ ᑐᙵᕕᒻᒧᑦ.

ᒍᐃᓐ ᐸᐃᑉᐹᖅᑖᕐᓯᒪᔪᖅ ᐃᓕᓐᓂᐊᕐᓯᒪᖓᓂᓄᑦ ᑭᒃᑯᑐᐃᓐᓇᕐᓄᑦ ᐋᓐᓂᐊᖅᑐᓕᕆᓂᕐᒧᑦ ᑖᓚ ᓛᓇ ᐃᓕᓴᕕᒻᒥ ᑭᒃᑯᑐᐃᓐᓇᕐᓄᑦ ᐋᓐᓂᐊᖅᑐᓕᕆᓂᕐᒥ ᓯᓚᑦᑐᓴᕐᕕᔾᔪᐊᖓᓂ ᑐᕌᓐᑐ.

ᕗᔨᓐᓂᐊ ᖁᓚᐅᑦ ᒨᓐᔅ

ᕗᔨᓐᓂᐊ ᒨᓐᔅ ᑐᑭᒧᐊᑦᑎᑦᑎᔨᓪᓗᐊᑕᖅ ᐃᓄᓐᓅᖓᔪᓂᑦ ᐱᓕᕆᖃᑎᒌᒍᑕᐅᕙᑦᑐᓂᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ. ᐃᖅᑲᓇᐃᔮᖃᖃᑦᑕᕐᓯᒪᔪᖅ ᓄᓇᕗᒻᒥ ᖁᕝᕙᓯᓐᓂᕐᐹᖏᓐᓂ ᓯᕗᓕᖅᑎᖃᕐᕕᒻᒥ ᐃᓚᒋᔭᐅᓪᓗᓂ ᒥᓂᔅᑕᒧᑦ ᑐᖏᓕᐅᓂᖅ ᐊᒻᒪᓗ ᒥᓂᔅᑕᐅᑉ ᑐᓪᓕᓱᖅᑎᖓ ᒐᕙᒪᓕᕆᔨᒃᑯᓐᓂᑦ, ᒥᓂᔅᑕᓄᑦ ᑎᑎᕋᖅᑎ, ᐊᒻᒪᓗ ᑎᑎᕋᖅᑎᓪᓗᐊᑕᖅ ᓄᓇᕗᑦ ᒐᕙᒪᒃᑯᖏᓐᓂᑦ, ᐃᓚᒋᔭᐅᓪᓗᓂ ᐊᐅᓚᑦᑎᔨᒻᒪᕆᒃ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂ. ᑖᒃᑯᓇᙵᓕᒫᖅ ᐃᖅᑲᓇᐃᔮᕆᓯᒪᔭᖏᓐᓂᒃ, ᕗᔨᓐᓂᐊ ᑲᒪᒋᔭᖃᖃᑦᑕᕐᓯᒪᔪᖅ ᑐᑭᒧᐊᒍᑎᔅᓴᓂᑦ ᐸᕐᓇᐃᓂᕐᒥᒃ ᑐᑭᒧᐊᑦᑎᑦᑎᓂᕐᒥᓪᓗ. ᕗᔨᓐᓂᐊ ᐊᖏᕐᓯᒪᔪᖅ ᐋᖅᑭᔅᓱᐃᕙᓪᓕᐊᓂᕐᒧᑦ ᐃᓄᓐᓄᑦ ᐃᖅᑲᓇᐃᔮᔅᓴᓂᑦ, ᐊᒻᒪᓗ ᐊᑑᑎᓕᓐᓂᑦ ᓄᓇᓕᓐᓂᑦ ᐱᕙᓪᓕᐊᔪᓕᕆᓂᕐᒧᑦ ᓄᓇᕗᒥ.

ᑭᓕᐅᕋᓐᔅ ᓯᓈᑦ

ᑭᓕᐅᕋᓐᔅ ᓯᓈᑦ ᐊᖓᔪᖅᑳᖑᕗᖅ ᐊᐅᓚᑦᑎᔨᒻᒪᕆᐅᓪᓗᓂᓗ ᓄᓇᕗᒥ ᐃᒡᓗᓕᐅᖅᑏᑦ ᐱᕈᖅᑎᑦᑎᓇᓱᒃᑎᖏᓐᓄᑦ, ᖃᐅᔨᒪᓂᖃᑦᑎᐊᖅᑐᖅ ᐱᓕᕆᖃᑦᑕᖅᓯᒪᓪᓗᓂᓗ ᑮᓇᐅᔭᓕᐅᕋᓱᖕᓂᒃᑯᑦ ᐊᒻᒪᓗ ᑮᓇᐅᔭᓕᐅᕋᓱᒃᑎᐅᖏᑦᑐᑦ ᐃᑲᔪᕋᓱᒃᑏᑦ ᖃᓄᐃᑦᑑᖕᒪᖔᑕ. ᐃᖃᓗᖕᓄᑦ ᓅᓚᐅᖅᓯᒪᔪᖅ ᔫᓂ 1995-ᖑᑎᓪᓗᒍ, ᐃᖅᑲᓇᐃᔭᕆᐊᖅᑐᓂ ᓄᓇᕗᒧᑦ ᐱᓕᕆᐊᖑᔪᒧᑦ ᐊᖓᔪᖅᑳᖑᓂᕐᒧᑦ ᐃᒡᓗᓕᐅᖅᑕᐅᕙᓪᓕᐊᔪᒧᑦ ᐊᖓᔪᖅᑳᖑᓚᐅᖅᑎᓐᓇᒍ, ᐊᖓᔪᖅᑳᒧᑦ ᑐᒡᓕᕆᔭᐅᓕᕆᓪᓗᓂ ᐊᒻᒪᓗ ᐊᐅᓚᔾᔪᑎᓄᑦ ᑲᒪᔨᒻᒪᕆᖑᓕᕆᓪᓗᓂ NCC-ᑯᓐᓄᑦ, ᑕᕝᕗᖓ ᐃᓂᒋᓕᖅᑕᒥᓅᓚᐅᖅᑎᓐᓇᒍ 2019-ᒥ.

ᑕᖃᓱᐃᑦᑑᓪᓗᓂ ᑕᒪᒃᑯᐊ ᓴᖅᑭᑕᐅᓂᑯᑦ ᑎᒥᐅᔪᑦ ᐃᑲᔪᖅᓯᖅᑕᐅᑦᑎᐊᖅᓯᒪᓗᑎᒃ ᐱᓕᕆᐅᑎᒃᓴᖏᓐᓂᓗ ᐊᑐᐃᓐᓇᖃᑦᑎᐊᖁᓪᓗᒋᑦ ᐊᑑᑎᖃᖁᓪᓗᒋᑦ ᐃᓄᖕᓄᑦ ᓄᓇᕗᒥᐅᓄᓪᓗ ᐱᓕᕆᖃᑦᑕᖅᐳᖅ. ᑭᓕᐅᕋᓐᔅ ᐃᖃᓗᖕᓂ ᐱᓕᕆᖃᑕᐅᑦᑎᐊᐸᒃᐳᖅ ᐊᖓᔪᖅᑳᖑᓪᓗᓂ ᕿᑭᖅᑖᓗᖕᒥ ᓇᖕᒥᓂᖃᖅᑎᐅᔪᑦ ᑲᑐᔾᔨᖃᑎᒌᖏᓐᓄᑦ, ᐊᖓᔪᖅᑳᑉ ᑐᒡᓕᕆᓪᓗᓂᐅᒃ ᐊᔪᕈᓐᓃᖅᐸᓪᓕᐊᓂᕐᒧᑦ ᓄᓇᕗᒥ ᐱᓕᕆᐊᖃᖅᑐᓄᑦ, ᑲᑎᒪᔨᐅᓪᓗᓂᓗ ᖁᓪᓕᖅ ᓄᑭᒡᓚᐅᑎᓕᕆᔨᒃᑯᑦ ᑎᒥᖁᑎᖓᓐᓄᑦ, ᐃᒃᓯᕙᐅᑕᐅᑉ ᑐᒡᓕᕆᓪᓗᓂᐅᒡᓗ ᓴᓇᔨᑦ ᖃᐅᔨᒪᔨᑕᑦ ᑲᑎᒪᔨᕋᓛᖏᓐᓄᑦ, ᑲᑎᒪᔨᐅᒋᕗᖅ Habitat for Humanity ᐃᖃᓗᖕᓂ, ᐊᒻᒪᓗ ᑲᑎᒪᔨᐅᕕᖃᖅᓯᒪᒋᕗᖅ ᑲᓇᑕᒥ ᐅᓇᑕᖅᑐᒃᓴᑦ ᑐᓴᐅᒪᑎᑦᑎᔨᑦ ᑲᑎᒪᔨᖏᓐᓄᑦ.

ᐃᓕᓴᕆᔭᐅᓯᒪᓂᖃᕆᕗᖅ ᑭᓕᐅᕋᓐᔅ ᓄᓇᓕᖕᓂ ᐱᓕᕆᖃᑕᐅᑦᑎᐊᖅᓯᒪᓂᖓᓄᑦ. ᐊᑭᓕᖅᓱᖅᑕᐅᒐᓂ ᐃᑲᔪᖅᑎᒻᒪᕆᐅᓂᖓᓄᑦ ᐃᓕᓴᕆᔭᐅᔪᕗᖅ ᕿᑭᖅᑖᓗᖕᒥ ᓇᖕᒥᓂᖃᖅᑎᐅᔪᑦ ᑲᑎᒪᔨᖏᓐᓄᑦ 2018-ᖑᑎᓪᓗᒍ, ᕿᑭᖅᑖᓗᖕᒥ ᓇᖕᒥᓂᖃᖅᑎᐅᔪᑦ ᐱᔪᓐᓇᖅᓯᓯᒪᔭᖏᓐᓄᓪᓗ ᐃᓕᓴᕆᔭᐅᓪᓗᓂ ᐊᕐᕌᒍᒧᑦ 2021 ᓇᖕᒥᓂᓕᒃ ᐃᑲᔪᕐᓂᖃᑦᑎᐊᖅᓯᒪᔪᖅ ᐊᕐᕌᒍᖓᓄᑦ.

ᑭᓕᐅᕋᓐᔅ ᐊᑖᑕᐅᓪᓗᓂ, ᐊᓇᐅᒋᐊᖅ ᒎᓪᕝᒥᑦ, ᐃᖃᓪᓕᐊᒐᓱᒃᐳᕐᓗ ᐃᖃᓗᐃᑦ ᑰᖓᓄᑦ ᐱᕕᖃᕌᖓᒥ.

ᑕᓂᐅᓪ ᒋᕕ

ᓯᕗᓕᖅᑎᓄᑦ ᐊᐅᓚᑦᓯᔨ ᑕᓂᐅᓪ ᒋᕕ ᑎᒍᒥᐊᖅᑐᖅ ᓯᕗᓕᕐᓂᕐᒥᒃ, ᐊᐅᓚᑦᓯᓂᕐᒥᒃ, ᐊᐅᓚᓂᖏᓐᓂᓪᓗ ᐃᓘᓐᓇᑦᓯᐊᖏᑦᑕ ᐊᐅᓚᓂᐅᔪᓄᑦ ᐊᓐᓇᐅᒪᒥ. ᑕᓂᐅᓪ ᓯᕗᓕᕈᓐᓇᖅᓯᑦᓯᐊᖅᓯᒪᔪᖅ ᖃᐅᔨᒪᓂᒻᒪᕆᖃᖅᓱᑎᒃ ᑮᓇᐅᔭᐅᓕᐅᕋᓱᐊᖅᑎᐅᖏᑦᑐᓂ ᐃᑲᔪᖅᑎᓅᖓᔪᓂᓂᓪᓗ, ᐱᕙᓪᓕᐊᓂᖃᓕᖅᓯᒪᑦᓱᓂ ᑲᒪᒋᔭᖃᕈᒪᓂᖓ ᐊᖑᑏᑦ ᐊᕐᓇᐃᑦ ᐊᔾᔨᒌᑎᑕᐅᓗᑎᒃ ᓄᓇᕐᔪᐊᕐᒥᓗ ᖃᓄᐃᑦᓯᐊᕐᓂᖅ. ᑕᓂᐅᓪ ᐃᓄᓐᓂᒃ ᑲᑎᑎᑦᓯᒍᓐᓇᖅᑐᖅ ᐃᓱᒻᒪᓯᕆᔭᐅᔪᓂᓪᓗ ᐊᐅᓚᔾᔭᐃᒋᐊᕈᑕᐅᓪᓗᑎᒃ ᓇᓗᓇᐱᕋᑦᓴᐅᔪᒥᒃ ᐊᑦᑐᐃᓂᐅᔪᒥᒃ. ᒫᓐᓇᕈᓗᒃ, ᑕᓂᐅᔾ ᐊᐅᓚᑦᓯᔨᐅᔪᔪᖅ ᐅᐸᓗᖓᐃᔭᕐᓂᕐᒧᑦ ᑲᑐᔾᔨᖃᑎᒌᓄᑦ ᐊᐅᓚᓂᖓᓐᓄᑦ ᐃᔨᓕᕆᓂᐅᑉ ᓄᓇᕐᔪᐊᕐᒥ. ᑕᕝᕙᓂ ᐃᖅᑲᓇᐃᔮᒥ, ᓯᕗᓕᖅᓯᒪᔪᖅ ᑎᒥᐅᔪᒧᑦ ᑮᓇᐅᔭᓂᒃ ᐅᐸᓗᖓᐃᔭᐅᑎᓄᑦ ᐊᑦᓱᖐᑦᓱᓂ ᐊᑯᓃᖅᑐᒨᖓᔪᓂᒃ ᑮᓇᐅᔭᓂᒃ ᑎᒥᐅᔪᒧᑦ, ᑲᑐᔾᔨᖃᑎᖃᑕᐅᑦᓯᐊᖅᓯᒪᑦᓱᓂᓗ ᐊᐅᓚᓂᓕᕆᔪᓄᑦ ᐊᐅᓚᔾᔭᐃᒋᐊᖅᓱᑎᒃ ᓴᓇᑐᓂᒃᑯᑦ ᐊᐅᓚᔾᔭᒋᐊᕈᑎᓂᒃ ᓴᙱᓕᖅᐹᓪᓕᖁᓪᓗᒍ ᐊᑦᑐᐃᓂᖓ.

ᑕᓂᐅᓪ ᐃᓕᓐᓂᐊᖅᓯᒪᔪᖅ ᓯᓚᑦᑐᓴᕐᕕᒻᒥ ᐱᓇᓱᐊᕐᕕᓐᓂᒃ ᐊᐅᓚᑦᓯᓂᕐᒥᒃ ᒪᐅᓐᑦ ᕋᐃᔪᓪ ᓯᓚᑦᑐᓴᕐᕕᔾᔪᐊᕐᒥ ᐃᓕᓐᓂᐊᖅᓯᒪᓯᓐᓈᑦ ᐃᓅᖃᑎᒌᓐᓅᖓᔪᓂᒃ ᑮᓇᐅᔭᓕᐅᕋᓱᐊᖅᑎᐅᖏᑦᑐᓂᓪᓗ ᐊᐅᓚᑦᓯᓂᕐᒥᒃ. 2017−ᒥ ᐱᔭᕇᔪᔪᖅ Aspen Network of Development Entrepeneurs (ANDE) ᑮᓇᐅᔭᖅᑑᑎᓂᒃ ᐊᐅᓚᑦᓯᓂᕐᒧᑦ ᐃᓕᓐᓂᐊᕐᓂᕐᒥᒃ, ᐃᓗᓕᓕᒫᖏᓐᓂᒃ ᑮᓇᐅᔭᖃᖅᑑᑎᖃᕐᓂᕐᒥᒃ ᐱᓇᓱᐊᕐᕕᕋᓛᓂᒃ ᐱᕈᖅᐸᓪᓕᐊᔪᓂᓪᓗ ᐱᓇᓱᐊᕐᕕᐅᔪᓂᒃ ᑐᕌᖅᑕᖃᖅᓱᓂ ᓴᖅᑭᐸᓪᓕᐊᔪᓂᒃ ᒪᓂᒪᑎᑕᐅᔪᓂᒃ. ᑕᓂᐅᓪ ᑲᔾᔮᕆᔭᖃᕐᒥᔪᖅ ᐱᓱᕋᔮᒋᐊᑦᓴᖅ ᓯᓂᑦᑕᕆᐊᕆᐊᑦᓴᕐᓗ, ᓴᐃᓕᒍᑎᒋᓪᓗᓂᒋᑦ. ᓂᖅᓯᐅᕆᐊᒥᒃ ᖁᕕᐊᑦᑐᖅ ᐱᖃᓐᓇᕆᔭᒥᓄᑦ ᐃᓚᒥᓄᓪᓗ, ᐱᙳᐊᕈᑎᓂᓪᓗ ᓈᑦᑎᒐᕐᓂᒃ ᖁᕕᐊᒋᔭᖃᓪᓚᕆᑦᓱᓂ.